පාස්කු ප්‍රහාරයෙන් පූජිත් ජයසුන්දර සහ හේමසිරි ප්‍රනාන්දු නිදහස්වීමට එරෙහිව නීතිපතිගේ අභියාචන පෙත්සම් විභාගයට දින නියමවෙයි

(skyworld.lk-Colombo- March 13, 2023)  පාස්කු ඉරුදින ත්‍රස්ත ප්‍රහාරයක් එල්ල වන බවට බුද්ධි තොරතුරු ලැබී තිබියදීත් එය වළක්වා ගැනීමට කටයුතු නොකිරීම සම්බන්ධයෙන් චෝදනා ලබා සිටි හිටපු පොලිස්පති පූජිත් ජයසුන්දර සහ හිටපු ආරක්ෂක ලේකම් හේමසිරි ප්‍රනාන්දු යන අයවලුන් නිදොස් කොට නිදහස් කිරීමට කොළඹ මහාධිකරණය ගත් තීරණයට එරෙහිව  නීතිපතිවරයා විසින් ඉදිරිපත් කරන ලද අභියාචනා පෙත්සම් විභාගයට ගැනීමට ශ්‍රේෂ්ඨාධිකරණය අද (13)  දින නියම කළා.

ප්‍රීති පද්මන් සූරසේන, යසන්ත කෝදාගොඩ, කුමුදුනී වික්‍රමසිංහ, මහින්ද සමයවර්ධන සහ අර්ජුන ඔබේසේකර යන මහත්ම මහත්මීන් ගෙන් සමන්විත පංච පුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියෙහි මෙම අභියාචනා කැඳවනු ලැබූවා.

ඉන් අනතුරුව අදාළ පෙත්සම ජුලි මස 4, 5 , 11,12 යන දිනවල විභාගයට ගන්නා බවත් විනිසුරු මඩුල්ල නියෝග කර සිටියා.

අදාළ අභියාචනා පෙත්සම් කැඳවූ අවස්ථාවේදී නීතිපතිවරයා වෙනුවෙන් පෙනී සිටි අතිරේක සොලිස්ටර් ජෙනරාල් ප්‍රියන්ත නාවාන මහතා අධිකරණය හමුවේ කරුණු දක්වමින් මෙම අභියාචනා පෙත්සම් වල පිටු පහක් අස්ථානගත වී ඇති බව දන්වා සිටියා.

එබැවින් ඒවා ප්‍රධාන නඩු ගොනුව හා සංසන්දනය කර අස්ථානගත වූ පිටු යළි සම්පූර්ණ කිරීමට අපේක්ෂා කරන බවත් අතිරේක සොලිසිටර් ජෙනරාල්වරයා සඳහන් කළා.

ඒ අනුව නඩුවට අදාළ ලිඛිත දේශන මැයි මස 31 වන දාට පෙර ගොනුකරන මෙන් නීතිපතිවරයාට නියෝග කළ ශ්‍රේෂ්ඨාධිකරණය එතැන් පටන් සති තුනක් තුළ වගඋත්තරකරුවන්ගේ ලිඛිත දේශන ගොනු කරන ලෙසත් නියෝග කර සිටියා.

අනතුරුව අදාළ පෙත්සම් විභාගය ජුලි 14 වනදා සිට ආරම්භ කරන බවත් නියෝගයේ සඳහන් වුණා

පාස්කු ඉරුදින ත්‍රස්ත ප්‍රහාරයක්  එල්ල වන බවට බුද්ධි තොරතුරු ලැබී තිබියදීත් එය වළක්වා ගැනීමට කටයුතු නොකිරීම සම්බන්ධයෙන් පූජිත් ජයසුන්දර සහ හේමසිරි ප්‍රනාන්දු යන මහත්වරුන්ට එරෙහිව නීතිපතිවරයා විසින් චෝදනා 855 කින් සමන්විත අධිචෝදනා පත්‍ර දෙකක් කොළඹ ත්‍රිපුද්ගල මහාධිකරණ විනිසුරු මඩුල්ලක් ඉදිරියේ ගොනු කරනු ලැබුවා.

දීර්ඝ නඩු විභාගයකින් අනතුරුව අදාළ විත්තිකරුවන් දෙදෙනා විත්තිවාචකය නොකැඳවා නිදොස් කොට නිදහස් කිරීමට ත්‍රිපුද්ගල විනිසුරු මඩුල්ල විසින් 2022 වසරේ පෙබරවාරි මස 18 වනදා තීරණය කළා.

එම තීරණය නීතියට පටහැනි යැයි පෙන්වා දෙන නීතිපතිවරයා එබැවින් එම තීන්දුව  බල රහිත කරන ලෙස ඉල්ලමින් මෙම අභියාචනා පෙත්සම් ඉදිරිපත් කර තිබෙනවා.

Leave a Reply

Your email address will not be published. Required fields are marked *